Seniortreff i Vang frå januar 2026

Denne møteplassen er tufta på frivilligheit, og meint for heimebuande seniorar som er sjølvstendige. Seniortreffet er eit trivselstiltak med fokus på sosialt samvær og å ete eit godt, varmt måltid saman.

Seniortreffet vil vere måndagar kl. 13.00-16.30 på Vangsheimen, med oppstart 5. januar 2026. Det blir kaffi og frukt, sosialt samvær og aktivitet, og treffa avsluttast med middag, dessert og kaffi. Samla pris blir kr 195,-.

Drifta av frivillige 

Seniortreffa vil bli drifta av frivillige. Elisabeth Myhre og Berit Nefstad er eldsjelene som har gjort ein kjempejobb med å få med seg folk som vil bidra. Me er veldig glade for at mange har sagt ja til å stille opp, og me trur dette vil bli ein triveleg møteplass med stort engasjement! 

Vang frivilligsentral er koordinator og støttespelar, og det er kjøkenet på Vangsheimen som lager maten. I november var dei frivillige samla på Vangsheimen for ein gjennomgang av rutinar, rolleavklaring, og å bli kjent med lokala og utstyret. Dei gler seg til å ta fatt på oppgåva og møte deltakarane på nyåret!

Me ynskjer å stimulere til at dei frivillige og deltakarane saman skaper ein møteplass med eit trygt og godt fellesskap. Me har allereie fått positive signal frå fleire som ønskjer å bidra med aktivitetar som høgtlesing, allsang, og enkel trim. Det vil bli laga månadsplaner slik at deltakarane veit kva som kjem av aktivitetar. Sei gjerne ifrå om du kan bidra med noko!

Påmelding og felleskøyring

Seniortreffet er ope for alle heimebuande seniorar som er sjølvstendige. Me ønskjer påmelding seinast kl. 12 fredagen før til Frivilligsentralen på 468 16 473. Det kan bli plassavgrensingar, så her er det førstemann til mølla som gjeld! Etterkvart blir det også sett krav til minimum antal påmeldte for å gjennomføre, slik at dei frivillige ikkje skal stille opp fånyttes.

Me oppfordrar til felleskøyring, og vil også engasjere frivillige sjåførar. Om du har skyssbehov kan du gi beskjed om dette ved påmelding, så prøver me å finne løysingar.

Det blir ikkje treff i ferier og på raude dagar. Me kjem til å evaluere seniortreffet etter kvart, og det er viktig at det fungerer for alle involverte parter. Det betyr at det kan bli endringar i tid/stad/rammevilkår om dei frivillige, deltakarane, Frivilligsentralen eller Vangsheimen ser behov for justeringar. 

Mat i sentrum 

Den største skilnaden på seniortreffet og andre aktivitetar i frivillig regi i Vang er middagen. Som tidlegare Helse- og omsorgsminister Bent Høie har sagt; «God mat og gode måltider får mirakler til å skje!» Me håper mange vil nytte denne mogelegheita til å samlast for å ete middag og ha det triveleg saman ein gong i veka.

Det er ei rekke andre møteplassar for seniorar i Vang, og vi tilrår også målgruppa å sjekke ut desse aktivitetane:

• Sterk og Stødig på Åsvang måndagar, i Øye tysdagar
• Tysdagskafé på Sara's mat
• Strikkekafé på Haukåsen, tysdagar
• Seniorgutta på Sara's mat, tysdagar ca kvar 14. dag
• Onsdagskafé med gåtur frå Drengestøga
• Balansetrening på Vangsheimen, torsdagar
• Handverksdag i Thorpe, torsdagar

Har du spørsmål, kontakt Frivilligsentralen på 468 16 473 // frivilligsentralen@vang.kommune.no

Arbeidsgruppa Levande lokalsamfunn har jobba gjennom hausten for å få på plass seniortreff frå januar

På opplæringa bretta dei frivillige brosjyrer som skal sendast ut til alle husstander i desember